Ai Abu gwage nuedi. Ai Abu dula ibedi, e dula obgwagwa miledeyobi mergue.
Ai Abu aggwadinagan ibedi, yeer dumgue neg ganiggidi.
Ibagwengi, ai wargwen ese gornoniggi. Ai wargwen morginnnid yoi, saggan
naladiggid se gornoniggi. Ai dasi, Abu asabin wawanmaggwissi sunmaggali:
-Ai abu, yeer gangu be negsemaid
an wisi, na bese gordaniggi. ¡Andi dule wilesa, nabba sadde,
uggudba bodi!
Yeer dumgu be neg nigga gusiidgine, ¿wis be diggarba an
sunna gudigusale?
Ai Abu, soladuggin gwisgusunna, gwage nued nigsoggu, Dasi sunmaggedba boed
nagase medde. ¡wiles ebinsa guali!
-¡Degirdi nabirdo , -Abu, Dasi,
abin imaged-, be walagwen danisoggu, ibmar sadde be nonibarsoggu,
na bega negdi wis daggergebe! ¡Bela an ibmargi be nagguledii gusunno!
Dasi, Abu abin idsomagde, yeer iddogedba.
-¡Emisginsunno!, -goddesunna.
Niimar, wis nadebar iddole. Ibagwengi, aggwabisgigan imbaba iba onoleali,
gaibirdi ogus iddoleali. Abu, dule nuga niggadsoggu, inna gobega
se gollesmoga. Ai abu, bela na e mimmigan bulagwa ibase nae soggarsunna.
Bela na ibmar dagnagusmala. Geb, Abu, ai dasise godsa, wegii ga soge:
-Ai Dasi, na mimmigan
bulagwa wis iba dagnasoggali; wedi be anga neg edarbedio. Anga neg; be nue
aggwo, ise durwiagwar, melle dule baigan anga odogo.
-¡Mer buggibbinsae, -ga Dasi soggali-, wegi na bemarga neg daggoe,
ibmar agar
gudsuli na be dagnonimarbaloe!
¡Bela na be ibmargi bemarga an naggulegoe!
Abu na e mimmigan bulagwa ibase bangudsunna. Ai abumar, bela weligwale,
aggwadinaganba neg odulo nadab guarmala.
Bela yeer iddogedbii, na siirmagdemala. Na gi dodoagwale, na saggan mudsubmudsub
ebuale bangudmala. Ai dasidi gi galudarba naggulegwissi guali. Geb, Abu e mimmi bur bibbigwad
nabbi demargigbi imbaba dogde dagsagu, Dasi, bar gwissigwwissi gudsuli; abbarmagde e gwenadgan
amied.
Ai Dasi, gwenadgan ibed daglearmoga.
Dasi, bela egimaladse godsasunna, ga wegii soge:
-¡Na bemarga neg nued amisa!
¡Bar anmmar wiledii, neg sadde gwen guosuli! ¡Na bemarga nega dar
dummadi amisa!
E gwenadgan ga argan ogodde, ga sogmala:
-¡Be, anmmar dummadi! ¡Be,
anmmar sagla sunnasogedi!
Dasimar bela na ibmar daggarmala: gas dagleali, noga, badde bela e mor oduggwamasmala neg baidse
naega. Dasimar, ai Abu neg sue soggarmala.
Ibagan nadbali. Iba dummadi onolesad bergunoniggi. Ai Abu ganar negse arbarsunna. Bela weligwale
alledani, Abumar na negse ganar ali. ¡Aaaaaa, aaaaa, aaaaa, alledani guarmala! Innagi ibmar
iddosmaladgi binsadani, Abu e mimmigan guali. Deg nadabbiidgi… e massi bur bibbigwad, diggasuli
ibmar dagsadgi, binnasuli guali, geb e babse godde:
-¡Baba, baba… anmar neggi, dule buggib buggwa! ¡We
dulemar, anmar negaggwed morgiid sunnabi yoi buggwa!
Dasi e sordagan bela morginnid yoidbii.
Abu e nega, e aggwadinagan, diggasurgus na agwedaniggid, Dasimar e ibe susa dagnoniggi.
Abu e yala, e nega, e ibmar sabed, dasimarse gwagnonisunna.
-Emisgi be an dagmalo!
Abu, abga Dasise urwedgi gordabbi:
-¡Dasi, bad anmmar nonisoggu! ¡Bela be ibmar be
wemalo! ¡Anmar gabsoggar na geggus nonimarsoggu!
-Degsuli, ai Abu, -Dasi, Abu abin soge-, be ibase nae soggargu, bela be yar be anga ugsa nade…,
we ibmar bar be gadsuli!
¡Emisgi, na be neg baid amimodeen!
Na yeer ulusmala, sunna sarsosalesarsosale na meddemala… geb ai Abu, gege neg bar aggolo iddoargu,
e mimmigan bulagwa e neg medde daglearsunna.
Ai Abu neg binid amie dagleali, e mimmiganga aggwadin binigan amiali.
E burwigan, muddigidba boardae, wile iddobugdae demar gaggaganba.
Abu mimmigan, ebbinne na aggwadingi dodosmalad geg ie guali, na e nabba
medde
armalad iesuli.
Geb, Abu masmala, Dasi burwigana sarsogedgi sunmaggarmala. Dasi burwigana
sasogedgi sunmaggarmala. Dasi mimmigan isdar dagleali. Gi dodoleali.
-¡Be dagge, addursamalad e goe daniggid!
¡Das, das, das, das!, -Abu masmala, Dasi e doddogan gadamala, geb sarsodamala, imbagi
doggusda-mala.
-¡Baid daniba, dag, dag, dag, dag!
Ai Dasimar daggali e burwigan yoggumai. E mimmigan galimbaba naogu, bar nonisurdae.
Geb…
-¡Ablis iddomaloye! -Dasimar godde.
-¡Ablis na daggemarye!, -ai Abumar abin imaged.
Geb bila dummad nodsunna. ¡Dag, dag, dag, bum, bum, bum, arrr, arrr, arrr! Ablis yeer ariosa, yeer
aumar burgwisa. Dasi nagnoniggi. Dasimar, esa nugar darbogid ebusmala, Abumar sulidi.
Dasimar sigu sunsogmalad ebusmala, Abumar sulidi. Aaga, anmmar daggar dae, Abumar mor yaragwa,
wilegediyobi demar gaggaba gudii. Demar gagggaba, gaya maamaa digwar emanana dae.
